بيوجرافى -محمد شرف-إلقاء نضال عبدالله

فى اول ماابتديت اوعي
واركز لمّا اشوف واسمع
انا فاكر ..
ساعتها الدنيا كات اوسع
برغم الدنيا كات بيتنا
لكن الوسع مش ف مكان
ده وسع قلوب
فهمت الدنيا بالمقلوب
وانه يادوب
مشاكلي كلها ف المشي
علي كام كلمه مابقولهاش
عل كام حاجه كنت انا دايما اعملها
وامي تقولي عيب و بلاش
وماسمعهاش
وقولت دي عال
لحد ماقال
ابويا باني هتعلم
صحيح انا كنت بتكلم
لكني سكتت
وقلبي ساعتها كان مقبوض
مانا مبسوط
و اغروني كتير بالناس
وبالصحبه
وباللمه
ونسيوا يقولوا دول هما
هيبقوا الدرس
مش اللي هيبقي ف كتابي
فتحت انا عالحياه بابي
بقلب بياضه كان ساده
امنت الدنيا بزياده
علي الرغم اني معرفهاش
بشوف الناس بعيني تمام
لكنّ بقلبي لسه طشاش
واول مابتديت الدَح
قالولي عشان ماتكتب صح
هتحفظ كام وعشرين حرف
واد ماكنت بنساهم
مابنساش اللي كان عالطرف
من الهمزه لحد الجيم
وم الميم لمّا للآخر
لكني كنت بتفاخر
باني قدرت اتعلم
تملي الرقص عالسلم
مابيوَّصّلش زاد أو قل
وانصاف الحلول مش حل
وان الحلو سهل يبان
وان المر شبهه كمان
وبين الاتنين تتوه ف الطَعم
وناس غلطت وصادها الطُعم
وقضت عمرها ف النُص
مجرد حشوه وسط النَص
لكن هختص
كلامي شويه عالاحلام
مشاعري وقتها كات خام
وزي ماشفت ف الافلام
حياه كل الولاد كات بنت
وانا شفت الحياه ف بسنت
كانت ابيض بنات الفصل
وده ف الاصل
سبب خلاني فحأه غرقت
علي الرغم ان انا دلوقت
مابتشدش اوي للبيض
لكني ساعتها كنت بقيد
ف وقت ماتبقي ادامي
قابلت انا بعدها اسامي
لكن اللهفه كات بتقل
لحد مايوم لقتني بمل
عرفت ان الشديد هيهون
وان السابقون سابقون
وان الحب زي قميص
بيبهت كل مالبسته
وعمره ماكان عليك دلوقت
بيشبه يوم ماجيت قيسته
وكنت انا كل يوم بكبر
بسيب كام ضحكه عالتخته
وكام شاطر وكام شخطه
وكام قصه وكام صاحب
بياض قلپي صبح شاحب
وشفت ان الزمان سارق
وان السجن للمسروق
وقاضي الذكري مش فايق
بيصدر حكمه عالمحقوق
انا دلوقتي قادر اقول
بان الوقت مش مَجدع
ف يوم وياك ويوم يخدع
وان الدنيا دي خنقه
وانه ف بيتنا كان اوسع ..